ساقية دوارة ديوان
شعر عامية بقلم محمد عبدالغني عمارة
الناشر دار ديوان العرب للنشر والتوزيع
ساقية دوارة وأنا داير فيها لا حد داري بيه ولا أنا داري بحالي .. حياتي غربة وأنا هويت الغربة ..
قالوا وحشك حد فيها !؟ قلت نفسي ... نفسي مش لاقيها .
نفسي دايما تايهه فيها !! نفسي غربة جوه غربه ،
والغريبة إن روحي ......... رايحه ليها .
من زمان والوحدة هي الصديق ، والرفيق سكون الليل ،
والقمر إن حضر معانا في الطريق .
صحبة هاديه ورايقه ، لا في يوم اختلفنا ولا اتعاركنا ،
مزاجنا واحد هو السكوت، همومنا جوانا وأيامنا بتفوت .
أفراحنا لحظة والضحكة بتموت .
اتجمعنا مره ع السطوح !! خدنا بالكدب الطموح .
طلع النهار .... شفناها الدنيا بالوضوح .
شفناها فيها غابة ، محوطاها الديابه ،
رجعنا بسرعة للكآبة .. من الخوف والشوف .
سكتنا من تاني وروحنا لليالي ،
أشكيلها كالعادة حالي .
دايره وعايشينها ولكل واحد طريقه .
فيها اللي غاوي الديابة ، وفيها جليس الغلابة ،
وأنا هويت الغربة ولحن الربابة .
محمد عبدالغني عمارة .
إرسال تعليق
0 تعليقات